აშშ-ში რუსეთის მოქალაქემ სანქციების გვერდის ავლით 2 მილიონის საავიაციო ნაწილების კონტრაბანდა აღიარა – მას 20 წლამდე პატიმრობა ემუქრება | აშშ-ის იუსტიციის დეპარტამენტი
აშშ-ში რუსეთის მოქალაქემ სანქციების გვერდის ავლით საავიაციო ნაწილების კონტრაბანდა აღიარა | ინფორმაციას აშშ-ის იუსტიციის დეპარტამენტი ავრცელებს.
ოფიციალურ განცხადებაში ნათქვამია, რომ რუსეთის, ესტონეთისა და შვეიცარიის მოქალაქეობების მქონე 32 წლის ანდრეი სამუილოვსკიმ სასამართლოში თავი დამნაშავედ ცნო.
მას ბრალი ედება აშშ-ის ეროვნული უსაფრთხოების კანონმდებლობისა და ექსპორტის კონტროლის რეფორმის აქტის დარღვევაში.
გამოძიების თანახმად, უკრაინაში რუსეთის სრულმასშტაბიანი შეჭრიდან 1 თვეში - 2022 წლის მარტში, სამუილოვსკიმ და მისმა თანამზრახველებმა არაბთა გაერთიანებულ საამიროებში დააფუძნეს ფიქტიური კომპანია ITC Middle East FZ-LLC.
აღნიშნული შუამავალი ფირმის სახელით ისინი ამერიკული კომპანიებისგან ყიდულობდნენ საექსპორტოდ კონტროლირებად, ორმაგი დანიშნულების საავიაციო და კოსმოსურ კომპონენტებს, თითქოს საამიროებში გამოსაყენებლად, თუმცა რეალურად პროდუქცია საბოლოოდ რუსეთში იგზავნებოდა სანქცირებული რუსი მომხმარებლებისთვის.
2022 წლიდან 2024 წლის სექტემბრამდე პერიოდში სქემის მონაწილეებმა ათეულობით ასეთი ფარული გზავნილის განხორციელება მოასწრეს, რომელთა ჯამურმა ღირებულებამ თითქმის 2 000 000 აშშ დოლარი შეადგინა.
საქმეს ერთობლივად იძიებდა აშშ-ის გამოძიების ფედერალური ბიურო [FBI] და აშშ-ის კომერციის დეპარტამენტის მრეწველობისა და უსაფრთხოების ბიურო [BIS].
აშშ-ის იუსტიციის დეპარტამენტის ცნობით, ფედერალური მოსამართლის, კარლ ნიკოლსის წინაშე ბრალის აღიარების შემდეგ, ანდრეი სამუილოვსკის 20 წლამდე თავისუფლების აღკვეთა ემუქრება. სასამართლო მისთვის საბოლოო განაჩენის გამოტანას 2027 წლის 13 იანვარს გეგმავს.