რუსთაველის გამზირზე სარეაბილიტაციო სამუშაოების შემსრულებელი კომპანია კიდევ ერთხელ დაჯარიმდა

რუსთაველის გამზირზე სარეაბილიტაციო სამუშაოების შემსრულებელი კომპანია კიდევ ერთხელ დაჯარიმდა | ინფორმაციას BPN ავრცელებს და წერს, რომ კომპანიას 13 სანქცია 3 თვეში დაეკისრა. მათივე ცნობით, საუბარია კომპანია „სმარტ სოლუშენსზე“, რომელსაც ფულადი სანქცია, წინა შემთხვევების მსგავსად, კვლავ სამუშაოების 24-საათიან რეჟიმში შესრულების ვალდებულების დარღვევის გამო დაეკისრა.

როგორც სახელმწიფო შესყიდვების ვებგვერდზე გამოქვეყნებული, 22 ოქტომბრით დათარიღებული ჯარიმის წერილიდან ირკვევა, ფულადი სანქციის ოდენობა 1 271 ლარია. საჯარიმო წერილში განმარტებულია, რომ 2026 წლის 20 ოქტომბერს განხორციელებული ინსპექტირების დროს რუსთაველის გამზირის, სავაჭრო ცენტრ „მერანიდან“ ბესიკის ქუჩამდე მონაკვეთის სარეაბილიტაციო სამუშაოები 24-საათიან რეჟიმში არ მიმდინარეობდა.

"სახელმწიფო შესყიდვის შესახებ ხელშეკრულების მე-9 მუხლის 9.8 პუნქტის შესაბამისად, ვინაიდან შემსყიდველის მიერ სამუშაოების ზედამხედველობის დროს განხორციელებული ინსპექტირებისას დადგინდა, რომ მიმწოდებელი აღნიშნულ მომენტში არ ახორციელებდა ხელშეკრულებით გათვალისწინებულ სამუშაოებს, დაგეკისრათ ჯარიმა ხელშეკრულების ღირებულების (6 355 905.86 ლარი) 0.02%-ის ოდენობით - 1 271.19 ლარი“ | აღნიშნულია წერილში.

ცნობისთვის, ეს რუსთაველის გამზირზე სარეაბილიტაციო სამუშაოების შემსრულებელი კომპანიისთვის ამ კონკრეტულ მონაკვეთზე რიგით მეოთხე ჯარიმაა. თუმცა, მას ხელშეკრულებით გათვალისწინებული სამუშაო დროის დარღვევისთვის მიღებული აქვს: თ. ჭოველიძის ქუჩიდან სავაჭრო ცენტრ „მერანამდე“ მონაკვეთზე - 3 ჯარიმა, ხოლო ბესიკის ქუჩიდან თავისუფლების მოედნამდე - 6 ჯარიმა. სულ კომპანიას ფულადი სანქცია უკვე 13-ჯერ დაეკისრა, ჯამში ჯარიმის მოცულობამ 18 ათას ლარს გადააჭარბა.