რუსთაველის გამზირის რეაბილიტაცია 1 თვით გახანგრძლივდა
თბილისის მერიასა და კონტრაქტორ კომპანია „სმარტ სოლუშენსს“ შორის 30 ოქტომბერს გაფორმებული შეთანხმების საფუძველზე, რუსთაველის გამზირის სარეაბილიტაციო სამუშაოების დასრულების ვადა დაახლოებით ერთი თვით გაიზარდა. კერძოდ, ხელშეკრულებაში შესული ცვლილებით, შესრულების პერიოდი 100-დან 130 კალენდარულ დღემდე გაიზრდა. ცვლილება პროექტის სამივე მონაკვეთს ეხება.
როგორც დოკუმენტშია აღნიშნული, ვადების გახანგრძლივების მთავარი მიზეზი გაუთვალისწინებელი დაბრკოლებები და არახელსაყრელი მეტეოროლოგიური პირობები გახდა: „სამუშაოების წარმოების პროცესში გამოვლინდა რიგი გაუთვალისწინებელი ფაქტორები, რამაც წარმოქმნა საპროექტო გადაწყვეტებში ცვლილებების განხორციელების აუცილებლობა და გაზარდა შესასრულებელ სამუშაოთა მოცულობები; საპროექტო ობიექტზე საკუთარი ქსელების რეაბილიტაციას ახორციელებდა არაერთი კომუნიკაციის კომპანია, რაც შპს „სმარტ სოლუშენსს“ უზღუდავდა ერთიანი სამუშაო ფრონტის არსებობას და წარმოადგენდა მნიშვნელოვან შემაფერხებელ გარემოებას“, - წერია მერიისა და კომპანიის მიერ გაფორმებულ შეთანხმებაში.