Axios: თეთრი სახლი რუსეთში ჭირის შესაძლო აფეთქებას აკვირდება

Axios-ის ცნობით, თეთრი სახლი აკვირდება რუსეთში შავი ჭირის სავარაუდო შემთხვევისა და მასთან დაკავშირებული საკარანტინო ზომების შესახებ ინფორმაციას. გამოცემის ცნობით, რუსეთის ჯანდაცვის ორგანოებმა სიფრთხილის ზომები მიიღეს შავი ჭირის წინააღმდეგ ბრძოლის კვლევით ცენტრში მომუშავე ქალის გარდაცვალებასთან დაკავშირებით, თუმცა არ დაადასტურეს, რომ ის შავი ჭირით იყო ინფიცირებული.

Axios-ის წყარომ აღნიშნა, რომ ტრამპის ადმინისტრაცია „ინფორმირებულია მოვლენების შესახებ, აკვირდება აფეთქებას და აფასებს შესაძლო ქმედებების ვარიანტებს“.

25 სექტემბერს, 28 წლის დარია შიპილოვამ, რომელიც რუსეთის ირკუტსკის რეგიონში შავი ჭირის წინააღმდეგ ბრძოლის კვლევით ინსტიტუტში მუშაობდა, შემთხვევით ფილტვის ჭირის გამომწვევი აგენტით სავსე სინჯარა გატეხა. 29 სექტემბერს შიპილოვა მძიმე პნევმონიის სიმპტომებით საავადმყოფოში მოათავსეს. 1-2 ოქტომბრის ღამეს ის გარდაიცვალა. გავრცელებული ინფორმაციით, ამის შემდეგ რეგიონის საავადმყოფოებში კარანტინი გამოცხადდა და 200-მდე ადამიანი იზოლაციაში გადაიყვანეს.

რუსეთის მომხმარებელთა უფლებების დაცვისა და საზოგადოებრივი ჯანმრთელობის ზედამხედველობის ფედერალურ სამსახურში [როსპოტრებნადზორი] 4 ოქტომბერს განაცხადეს, რომ ბიოლოგიური უსაფრთხოების მოთხოვნების დაცვის კომისიამ შეამოწმა ირკუტსკის ინსტიტუტი და განაცხადა, რომ დაავადების გამომწვევ მიკროორგანიზმებთან მუშაობისას არანაირი საგანგებო სიტუაცია არ დაფიქსირებულა. უწყება აცხადებს, რომ გარდაცვლილ 28 წლის ლაბორანტს „დაუდგენელი წარმოშობის პნევმონია“ ჰქონდა. მათივე მტკიცებით, გაფართოებულმა კვლევებმა პაციენტის ორგანიზმში არ აღმოაჩინა ისეთი მიკროორგანიზმები, რომლებიც მის პროფესიულ საქმიანობასთან იყო დაკავშირებული. „როსპოტრებნადზორი“ ირწმუნება, რომ რეგიონში ეპიდემიოლოგიური სიტუაცია სრულიად სტაბილურია და კარანტინში მყოფ არცერთ პირს ინფექციის ნიშნები არ აღენიშნება.