სოჭის პორტის აკვატორიაში დატვირთული ნავთობტანკერი იწვის

სოჭის პორტის აკვატორიაში ნავთობტანკერი იწვის. კადრები telegram-არხებზე ვრცელდება

ხანძრის გამომწვევ მიზეზთან დაკავშირებით ოფიციალური განცხადება ჯერჯერობით არ გაკეთებულა.

ცეცხლში გახვეული გემი იდენტიფიცირებულია, როგორც ლიბერიის დროშის ქვეშ მცურავი ნედლი ნავთობის ტანკერი AFRAMAX RIO. მიუხედავად იმისა, რომ იგი ამჟამად არ არის სანქცირებული ევროკავშირის ან დასავლელი მოკავშირეების მიერ, 2026 წლის 12 თებერვალს ხომალდი შეიყვანეს უკრაინის ეროვნული უსაფრთხოებისა და თავდაცვის საბჭოს სანქციების სიაში 90 სხვა გემთან ერთად, რომლებიც რუსეთის „ჩრდილოვან ფლოტში“ მოიაზრებიან, იუწყება ASTRA.

ASTRA-ს ცნობით, ტანკერი ეკუთვნის მარშალის კუნძულებზე დარეგისტრირებულ RIO ENTERPRISES SA-ს, ხოლო მისი ოპერირება ხორციელდება სინგაპურში ბაზირებული Navig8 Group-ისა და საბერძნეთის მართვის კომპანიების, მათ შორის Hellenic Tankers Co Ltd-ის მეშვეობით.

გემს, რომელსაც 100,000 მეტრულ ტონამდე ნედლი ნავთობის (700,000–750,000 ბარელი) გადაზიდვა შეუძლია, 2024 წლიდან 2026 წლამდე დოკუმენტირებული ისტორია აქვს რუსული ნავთობის ტრანსპორტირების ისეთი პორტებიდან, როგორებიცაა უსტ-ლუგა, ნოვოროსიისკი და ტამანი, საერთაშორისო ბაზრებზე, მათ შორის ინდოეთში, სინგაპურსა და საუდის არაბეთში.

პლატფორმა MarineTraffic-ის თანახმად, ხომალდი თურქეთის თუზლას პორტიდან 2026 წლის 11 სექტემბერს გამოვიდა, შეჩერდა სამსუნში, რის შემდეგაც 22 სექტემბერს რუმინეთის კონსტანცას პორტს მიაღწია. AIS-ის მონაცემებმა ხანძრის გაჩენამდე ცოტა ხნით ადრე მისი ადგილმდებარეობა სოჭის სანაპირო ზოლიდან დაახლოებით 15 კილომეტრში დააფიქსირა.